…رئيس العمال: صباح الخير سيدي ومتأسف على الازعاج بس

صاحب المزرعة: بس شو؟؟  ما بدك ارتاح بهالاجازة؟  كلهم 20 أجازة بأخذهم بالسنة ولازم كل مرة تزعجوني بالاجازة؟

رئيس العمال: والله بعرف والله يكون في عونك سيدي.  بتتعب كثير ومشاكل المزرعة كثيرة وتحتاج أجازات طويلة وكثيرة بس

صاحب المزرعة: لا تظل تقول بس. اي انا حطيتك رئيس عمال مشان ارتاح وأخلص من وجع الراس. مهتمك تشغل المزرعة وتحط فلوس في حسابي دون ازعاجي. وانت عارف مثل ما شلت الي قبلك بشيلك

رئيس العمال: والله يا سيدي هي عم بقبض من العمال بدل ما ادفع لهم وبعصر كل قرش منهم وما ظل شي في المزرعة الا بعناه بس الوضع

صاحب المزرعة: برجع بقول لي بس.  بس شو؟  مش قلت لك كل ما يصير شي في المزرعة او في مزارع جيراننا طلع تصريح وقول صاحب المزرعة قال هيك وعمل هيك واشتغل هيك؟  مش قلت لك اعمل هيك حتى العمال والمزارعين ينسوا انه انا في اجازة من شهر؟

 …رئيس العمال: صحيح صحيح سيدي وعم بعمل هيك بس

صاحب المزرعة: بس تقول بس مشان الله.  مش قلك لك كمان كل فترة وفترة قول للعمال والمزارعين اني عم بشارك في معرض للاعلاف في بلاد بره مشان المزرعة او عم بشارك في اجتماعات مع اصحاب مزارع مشان يدعموا مزرعتنا؟

رئيس العمال: يا سيدي عملت هيك وأكثر لكن (مش بس) الوضع متأزم كثير وتصريح بأسمك او مشاركتك في معرض لن ينفعوا مع الوضع الحالي

صاحب المزرعة: اي وضع؟  ما انا وانت عارفين انه العمال والمزارعين بسيطين وبنضحك عليهم بكم كلمة مهما كان الوضع واذا تأزم شوية الوضع رأس مالها نرجع لهم كم قرش من المئات التي أخذناها منهم وبرجعوا زي الارانب.  اي وضع مش قادر تحله؟

 …رئيس العمال: كلامك صح سيدي وعم بحاول بس

صاحب المزرعة: لسه بقول لي بس!! مش قلت لك اذا تأزم الوضع كثير اعمل للعمال والمزارعين حفلات موسيقى؟  وكمان اعمل لهم انتخابات نقابة عمال لا بتهش ولا بتنش وخليهم يتقاتلوا على مقاعد النقابة؟

رئيس العمال: عملنا سيدي عملنا وبدل الحفلة عملنا مهرجانات وبدل انتخابات نقابة عملنا انتخابات نقابات لكن الوضع لسه متأزم

صاحب المزرعة: متأزم مش متأزم مش رح ارجع من الاجازة غير لما تخلص الاجازة. دبر حالك ولا تنسى تحول لي فلوس. ترى مصاريف الاجازة مش قليلة ولا تحكي معي كمان مرة غير مشان تعطيني رقم التحويل, مفهوم؟

.رئيس العمال: حاضر حاضر سيدي وانا متأسف على ازعاجك

أنتهت المكالمة